මැදපෙරදිග
රටවල සේවය කරන ගෘහ සේවිකාවන්ගේ සේවා කාලය පැය 8කට සීමා කිරීමට ගල්ෆ් රටවල
කම්කරු අමාත්‍යවරුන් එකඟතාවකට පැමිණ තිබෙනවා. බී.බී.සී. ලෝක සේවය වාර්තා
කළේ ඊට අදාළ ගිවිසුමකට ද අත්සන් තබා ඇති බවයි. ඒ අනුව ගෘහ සේවිකාවන්ට
සතියකට නිවාඩු දිනයක් ලබාදීමටත්, ගල්ෆ් රටවල කම්කරු අමාත්‍යවරුන් තීරණය කර
තිබෙනවා. එමෙන්ම සෑම ගෘහ සේවිකාවකටම වාර්ෂික නිවාඩු ලබාදීමටත් ඔවුන් තීරණය
කර ඇති බවයි බී.බී.සී. වාර්තාවේ දැක්වෙන්නේ.
සේවා යෝජකයා නොමැති නම් සිය හාම්පුතාගේ නිවසින් බැහැරව ජීවත් වීමට ගෘහ
සේවිකාවන්ට අයිතිය ලබාදීමට ද මෙහිදී එකඟතාවක් ඇති කරගෙන තිබෙනවා.
ගෘහ සේවිකාවන්ට සිදුවන හිරිහැර සම්බන්ධයෙන් බහරේනය, කුවේටය, ඕමාන්,
කටාර්, සෞදි අරාබිය සහ එක්සත් අරාබි එමිර් රාජ්‍යයට ජාත්‍යන්තර මානව
හිමිකම් සංවිධානවලින් ඉකුත් සමයේ දැඩි චෝදනා එල්ල වුණා.
